ព្រះសីហនុ៖ នាយកគម្រោងការទប់ស្កាត់សំណល់ប្លាស្ទិកសមុទ្រនៅកម្ពុជា លើកទឹកចិត្តប្រជាពលរដ្ឋនៅតាមសហគមន៍ចូលរួម កាត់បន្ថយការប្រើប្រាស់ប្លាស្ទិកនៅតាមតំបន់ឆ្នេរ តាមរយៈការកែច្នៃនិងប្រើប្រាស់សំណល់ទាំងអស់នោះឡើងវិញ។

ក្នុងពិធីសម្ពោធកម្មវិធីដំណោះស្រាយសហគមន៍ដើម្បីឆ្នេរសមុទ្រគ្មានប្លាស្ទិក នៅថ្ងៃទី១៧ ខែកុម្ភៈ ឆ្នាំ២០២២ ទីប្រឹក្សារដ្ឋមន្រ្ដីក្រសួងបរិស្ថាន និងជានាយកគម្រោងការទប់ស្កាត់សំណល់ប្លាស្ទិកសមុទ្រនៅកម្ពុជា លោក គិត ច័ន្ទគ្រឹស្នា លើកឡើងថាការផ្សព្វផ្សាយ និងលើកទឹកចិត្តតាមសហគមន៍ឱ្យពួកគាត់ផលិតសម្ភារជំនួសការប្រើប្រាស់ប្លាស្ទិក និងកែច្នៃប្លាស្ទិកប្រើប្រាស់ឡើងវិញជាផ្នែកមួយសំខាន់នៃការកាត់បន្ថយការប្រើប្រាស់ប្លាស្ទិក។

លោកបានឱ្យដឹងទៀតថា រាជរដ្ឋាភិបាលនិងក្រសួងបរិស្ថានបានរៀបចំក្របខ័ណ្ឌគោលនយោបាយ យុទ្ធសាស្រ្ត ព្រមទាំងច្បាប់ និងគតិយុទ្ធនានា ដើម្បីគ្រប់គ្រងសំរាម សំណល់រឹងទីប្រជុំជន ប៉ុន្តែដៃគូអនុវត្តន៍ និងប្រជាពលរដ្ឋក៏ត្រូវចូលរួមទាំងអស់គ្នា ដើម្បីកុំអោយបញ្ហាប្លាស្ទិកនេះបន្សល់ទុកដល់អ្នកជំនាន់ក្រោយៗ។

តាមរយៈគម្រោងផ្តួចផ្តើមនេះក្រុមហ៊ុន TonToTon ដែលជាក្រុមហ៊ុនលក់ឥណទានប្លាស្ទិក ធ្វើការសហការជាមួយប្រជាពលរដ្ឋនៅសហគមន៍ក្នុងខេត្តព្រះសីហនុក្នុងការប្រមូលប្លាស្ទិកតាមតំបន់ឆ្នេរដើម្បីយកទៅដុតនៅក្រុមហ៊ុន Chip Mong Insee Cement ក្នុងខេត្តកំពត។ តាមរយៈកម្មវិធីមួយនេះ គេរំពឹងថានឹងអាចប្រមូលប្លាស្ទិកបានជាង ៣ពាន់តោនក្នុងដំណាច់ឆ្នាំ២០២២នេះ៕